आरटीई प्रवेश जाहीर: १४ फेब्रुवारीपासून मेसेजद्वारे माहिती, प्रवेश नाकारणाऱ्या शाळांवर कारवाई !!

आरटीईच्या प्रवेश प्रक्रियेबाबत महत्त्वपूर्ण माहिती जाहीर करण्यात आली असून, १४ फेब्रुवारीपासून पालकांना त्यांच्या मुलांच्या प्रवेशासंदर्भातील माहिती थेट मोबाइलवर मेसेजद्वारे मिळणार आहे. राज्यातील खासगी शाळांमध्ये आरटीई अंतर्गत प्रवेश प्रक्रियेची ऑनलाइन सोडत नुकतीच घोषित करण्यात आली. या प्रक्रियेद्वारे निवड झालेल्या विद्यार्थ्यांच्या पालकांना त्यांची निवड झाल्याची अधिकृत माहिती एसएमएसद्वारे कळविण्यात येणार आहे. शिक्षण आयुक्त सचिंद्र प्रतापसिंह यांनी स्पष्ट केले आहे की, जर कोणत्याही शाळेने विद्यार्थ्यांना प्रवेश नाकारला, तर त्या शाळेविरोधात कठोर कारवाई केली जाईल. तसेच, प्रवेश प्रक्रियेसाठी पालकांची दिशाभूल करणाऱ्या एजंट्सवरही शिक्षण विभागाकडून आवश्यक ती कारवाई केली जाणार आहे. पालकांनी अशा प्रकारच्या कोणत्याही गैरप्रकाराची माहिती मिळाल्यास त्वरित शिक्षण विभागाला कळवावी, असे आवाहनही त्यांनी केले आहे.

राज्यातील आरटीई अंतर्गत मिळणाऱ्या प्रवेशांसाठी सर्वाधिक अर्ज पुणे जिल्ह्यातून आले आहेत. एकूण ६१,६७३ अर्जांपैकी सर्वाधिक अर्ज कात्रज येथील पोदार शाळेसाठी प्राप्त झाले आहेत. या शाळेत केवळ ७१ जागा उपलब्ध असताना, तब्बल ३,३७६ अर्ज पालकांनी भरले आहेत. मागील वर्षीही हाच ट्रेंड दिसून आला होता. यावरून राज्यातील नामांकित शाळांमध्ये प्रवेश मिळवण्यासाठी पालकांमध्ये मोठ्या प्रमाणावर उत्सुकता आहे, हे स्पष्ट होते.

आरटीई प्रवेश प्रक्रियेची ऑनलाइन सोडत ‘महाराष्ट्र राज्य शैक्षणिक आणि संशोधन परिषद’ (एससीईआरटी) च्या कार्यालयात शिक्षण विभागाचे अधिकारी, पत्रकार आणि सामाजिक संघटनांचे प्रतिनिधी यांच्या उपस्थितीत पार पडली. यावेळी नवीन मराठी शाळेच्या विद्यार्थ्यांनी चिठ्यांद्वारे क्रमांक काढून सोडतीची प्रक्रिया पार पाडली. शिक्षण आयुक्त सचिंद्र प्रतापसिंह, प्राथमिक शिक्षण संचालक शरद गोसावी, एससीईआरटीचे संचालक राहुल रेखावार, योजना संचालक महेश पालकर, बालभारतीचे संचालक कृष्णकुमार पाटील, तसेच प्राथमिक शिक्षण संचालनालयाचे सहसंचालक रमाकांत काठमोरे हे सर्व मान्यवर या सोडतीच्या प्रक्रियेला उपस्थित होते.

यंदा शाळांची संख्या काही प्रमाणात कमी झाली असली, तरीही आरटीई अंतर्गत प्रवेशक्षमतेत पाच हजार जागांची वाढ करण्यात आली आहे. ही प्रवेश प्रक्रिया अधिक पारदर्शक आणि प्रभावी व्हावी म्हणून ‘राष्ट्रीय सूचना केंद्र’ (एनआयसी) यांच्याकडे संबंधित माहिती पाठविण्यात आली आहे. त्याआधारे विद्यार्थ्यांच्या प्रवेशाची अंतिम माहिती लवकरच प्रसिद्ध केली जाणार आहे. निवड झालेल्या विद्यार्थ्यांचे पालक आपल्या अर्जात दिलेल्या मोबाइल क्रमांकावरून त्यांचा प्रवेश जाहीर झाल्याची खात्री करू शकतील.

आरटीई अंतर्गत आर्थिकदृष्ट्या दुर्बल आणि वंचित गटातील विद्यार्थ्यांना दर्जेदार शिक्षण मिळावे, यासाठी सरकार ही योजना राबवत आहे. यामुळे गुणवत्तापूर्ण शालेय शिक्षण घेण्याची संधी अधिकाधिक विद्यार्थ्यांना उपलब्ध होईल आणि ते उच्च शिक्षण घेऊन देशाच्या प्रगतीस हातभार लावतील, अशी अपेक्षा शिक्षण आयुक्त सचिंद्र प्रतापसिंह यांनी व्यक्त केली.