मुख्यमंत्री ‘माझी लाडकी बहीण’ योजनेचा जून हप्ता खात्यात जमा होण्यास सुरुवात – मंत्री आदिती तटकरे यांची मोठी घोषणा! | Ladki Bahin Scheme: June Payout Begins!

राज्यातील लाखो महिलांसाठी सुरू करण्यात आलेली मुख्यमंत्री माझी लाडकी बहीण योजना आता अधिक गतिमान होत असून, या योजनेच्या जून महिन्याच्या हप्त्याबाबत एक अत्यंत आनंददायक अपडेट समोर आली आहे. महिला आणि बालविकास मंत्री आदिती तटकरे यांनी स्वतः सोशल मीडियावरून यासंदर्भातील माहिती दिली असून, राज्यभरातील लाडक्या बहिणींमध्ये नवचैतन्य संचारले आहे.

गेल्या महिन्यात म्हणजेच मे महिन्याचा हप्ता जूनच्या पहिल्या आठवड्यात पात्र महिलांच्या खात्यात जमा करण्यात आला होता. मात्र ३० जून २०२५ रोजी सरकारने जून महिन्याच्या हप्त्यासाठी ३६०० कोटी रुपयांचा निधी मंजूर केला असला, तरी प्रत्यक्ष जमा होण्यात विलंब झाला होता. यामुळे महिलांमध्ये संभ्रम निर्माण झाला होता आणि अनेकांनी सोशल मीडियावर ‘हप्ता कधी?’ असा प्रश्न उपस्थित केला होता.

या पार्श्वभूमीवर, ४ जुलै २०२५ पासून जून महिन्याचा हप्ता लाडक्या बहिणींच्या खात्यात जमा करण्याची प्रक्रिया सुरू करण्यात आली आहे. मंत्री आदिती तटकरे यांनी याबाबत एक्स (पूर्वीचं ट्विटर) वरून माहिती दिली असून, तांत्रिक प्रक्रिया पूर्ण करून हप्त्यांचे वितरण सुरू झाले आहे, असे त्यांनी स्पष्ट केलं.

मंत्री तटकरे म्हणाल्या की, “मुख्यमंत्री माझी लाडकी बहीण योजनेतील सर्व पात्र लाभार्थ्यांना जून महिन्याचा सन्मान निधी वितरित करण्याची तांत्रिक प्रक्रिया सुरू झाली आहे. उद्यापासून आधार लिंक असलेल्या खात्यांत हा निधी जमा होणार आहे.” हा निधी थेट DBT (Direct Benefit Transfer) द्वारे खात्यात वर्ग केला जात आहे.

या योजनेच्या यशामागे मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि अजित पवार यांचे सक्रिय मार्गदर्शन, तसेच राज्यातील लाडक्या बहिणींचा दृढ विश्वास हे बळ असल्याचे तटकरे यांनी नमूद केले. त्यांचा विश्वास आहे की, ही योजना यापुढेही यशस्वीपणे आणि नियमितपणे सुरू राहील.

योजना कशी आहे हे सांगायचं झालं, तर जून २०२४ मध्ये ही योजना जाहीर झाली आणि जुलैपासून प्रत्यक्ष अमलात आली. या योजनेद्वारे पात्र महिलांना दर महिन्याला ₹१५०० सन्मान निधी मिळतो. आतापर्यंत १२ महिने म्हणजे जुलै २०२४ ते जून २०२५ या कालावधीतील हप्ते लाभार्थ्यांच्या खात्यात जमा झाले आहेत.

जुलै, ऑगस्ट, सप्टेंबर, ऑक्टोबर, नोव्हेंबर, डिसेंबर २०२४ व जानेवारी, फेब्रुवारी, मार्च, एप्रिल, मे आणि जून २०२५ या एकूण १२ महिन्यांचे हप्ते दिले गेले असून, त्यापैकी जून महिन्याचा हप्ता ४ जुलैपासून वर्ग होण्यास सुरुवात झाली आहे.

या घोषणेमुळे राज्यातील लाखो लाडक्या बहिणींना दिलासा मिळाला आहे. अनेक जण आपल्या घरखर्चात या निधीचा उपयोग करत असून, ही योजना केवळ आर्थिक आधार नाही तर स्त्री सन्मानाचं प्रतीक ठरत आहे. योजनेच्या नियमित अंमलबजावणीमुळे महिलांमध्ये शासनाबद्दल विश्वास निर्माण झाल्याचं चित्र दिसत आहे.