CET प्रवेश रखडलाय!-CET Admission Delayed!

महाराष्ट्र सीईटी २०२५ प्रवेश प्रक्रियेचं हे चित्र बघून खरंच धक्का बसतोय. यंदा बारावीचा निकाल राज्य मंडळानं अपेक्षेपेक्षा वेगानं म्हणजेच ५ मे रोजीच जाहीर केला. त्यामुळे विद्यार्थ्यांना आणि त्यांच्या पालकांना वाटलं की यंदा तरी व्यावसायिक अभ्यासक्रमांचे प्रवेश वेळेत आणि सुरळीत पार पडतील. पण नेहमीप्रमाणेच, सरकारी यंत्रणांची दिरंगाई आणि गोंधळ पुन्हा एकदा समोर आलाय.

इंजिनिअरिंग, फार्मसी, लॉ, अशा करिअरनिर्मितीच्या दृष्टीने महत्त्वाच्या अभ्यासक्रमांच्या प्रवेश नोंदणी प्रक्रियाच अजून पूर्ण झालेल्या नाहीत. सीईटी सेलकडून ना काउंसिलिंगचा स्पष्ट टप्पा जाहीर झालाय, ना तारीख, ना अर्ज प्रक्रियेचा निर्धार. विद्यार्थ्यांना केवळ वाट पाहणं हाच एकमेव पर्याय उरलाय. त्यामुळे प्रवेशासाठीची अनिश्चितता वाढत चालली आहे.

याउलट, खासगी आणि अभिमत विद्यापीठांनी मात्र वेळेचं नियोजन काटेकोर केलंय. त्यांची प्रवेश प्रक्रिया अंतिम टप्प्यात आली आहे आणि काही ठिकाणी वर्गसुद्धा लवकरच सुरू होणार आहेत. त्यामुळे अनेक गुणवंत विद्यार्थी, खासगी विद्यापीठांत प्रवेश घेण्याचा विचार करत आहेत – जरी फी भरपूर जास्त असली तरी. ही परिस्थिती आर्थिकदृष्ट्या मागास वर्गातल्या विद्यार्थ्यांसाठी गंभीर आहे, कारण सरकारी कॉलेजांमध्ये प्रवेश मिळणं हीच त्यांच्यासाठी मोठी संधी असते.

या सगळ्या गोंधळात सीईटी सेलचं मौन आणखी खटकतंय. ना मीडिया प्रश्न विचारतंय त्यावर उत्तर दिलं जातंय, ना उमेदवारांसाठी कोणतं निवेदन. प्रशासनाकडून कोणतीही अधिकृत माहिती मिळत नसल्यामुळे विद्यार्थी आणि पालक प्रचंड संभ्रमात आहेत. शैक्षणिक वर्ष सुरू होण्याच्या ऐन उंबरठ्यावर विद्यार्थ्यांचं मन स्थिर नाही, अभ्यास सुरू करावा की वाट पहावी, असा प्रश्न त्यांच्या समोर आहे.

या प्रवेश प्रक्रियेचा संथपणा केवळ वेळेचा अपव्यय नाही, तर तो विद्यार्थ्यांच्या करिअरशी, भविष्याशी, मानसिक आरोग्याशी थेट संबंधित आहे. सरकारने वेळेत निकाल दिला हे जरी कौतुकास्पद असलं, तरी प्रवेशाच्या बाबतीत नेहमीसारखीच उदासीनता पुन्हा दिसून आली आहे.
एकंदरीत, ‘निकाल लवकर, प्रवेश उशीर’ हा विरोधाभासच आता महाराष्ट्राच्या शैक्षणिक प्रक्रियेची ओळख बनू लागला आहे. आता तरी राज्य सरकार आणि सीईटी सेल यांनी वेळेत निर्णय घ्यावा, नाहीतर हजारो विद्यार्थ्यांच्या भविष्याला फटका बसण्याची शक्यता नाकारता येणार नाही.