मुंबई महापालिकेतील अभियांत्रिकी गोंधळ! उपप्रमुख अभियंता पदे रिक्त, जबाबदाऱ्या प्रभारींवर; रस्ते विभाग ठरतोय बळी! | BMC Engineering Chaos! Vacant Posts Burden Deputies – Roads Department in Crisis!

मुंबई महानगरपालिकेच्या (BMC) विविध प्रकल्पांमध्ये सध्या अभियांत्रिकी कामांचा मोठा डोंगर उभा आहे. मात्र, या प्रकल्पांच्या नियोजन व अंमलबजावणीसाठी अत्यंत महत्त्वाचे असलेले उपप्रमुख अभियंता संवर्ग सध्या अक्षरशः अपूर्ण अवस्थेत आहे. महापालिकेच्या विविध खात्यांमध्ये एकूण १३ ते १४ उपप्रमुख अभियंता पदे रिक्त असून यामुळे कारभाराचा भार प्रभारी कार्यकारी अभियंत्यांवर टाकण्यात आला आहे. विशेषतः रस्ते विभागामध्ये ही परिस्थिती अधिकच गंभीर बनली आहे.

महापालिकेने सध्या मुंबईतील सुमारे ८०० किलोमीटर लांबीचे सिमेंट काँक्रिट रस्त्यांचे काम हाती घेतले आहे. या कामांमुळे रस्ते विभागावर ताण वाढलेला असतानाही, विभागात दोन महत्त्वाची उपप्रमुख अभियंता पदे रिक्त असून ती जबाबदारी कार्यकारी अभियंत्यांकडे सोपवण्यात आली आहे. ही तात्पुरती व्यवस्था असली, तरी दीर्घकाळासाठी ती कारभाराच्या गुणवत्ता व निर्णयक्षमतेवर परिणाम करू शकते.

या विभागातील एका उपप्रमुख अभियंता संजय सोनावणे हे लवकरच सेवानिवृत्त होणार आहेत. तर पश्चिम उपनगर व शहर विभागात उपप्रमुख अभियंत्यांची नेमणूकच झालेली नाही. त्यामुळे एकूणच रस्ते विभागातील व्यवस्थापन प्रभारी अभियंत्यांच्या खांद्यावर आहे. परिणामी, यांच्यावर अतिरिक्त जबाबदाऱ्या पडत असून वरिष्ठ अभियंत्यांना तारेवरची कसरत करावी लागत आहे.

महानगरपालिकेच्या नियमांनुसार, कार्यकारी अभियंत्यांना पदोन्नती देऊन उपप्रमुख अभियंता बनवले जाते. मात्र, अनेक प्रस्ताव मंजुरीच्या वाटेवरच थांबलेले आहेत. एप्रिल महिन्यात महापालिका आयुक्तांनी या पदोन्नतीच्या प्रस्तावांना मंजुरी दिली असतानाही, प्रत्यक्षात नियुक्त्या झालेल्या नाहीत. त्यामुळे पदोन्नतीची वाट पाहणारे अभियंते नाराजी व्यक्त करत आहेत.

या रिक्त जागांमुळे महापालिकेतील अभियांत्रिकी कामांचा गती मंदावली असून, निर्णय प्रक्रियेत खोळंबा निर्माण झाला आहे. सर्व प्रकल्पांची जबाबदारी काही मोजक्या अधिकाऱ्यांवर दिल्याने ते ही नैतिक व व्यावसायिकदृष्ट्या तणावात आहेत. विशेषतः ज्येष्ठ अभियंत्यांच्या सेवानिवृत्तीनंतर पदोन्नती न झाल्यास, वरिष्ठ अधिकाऱ्यांची कमतरता आणखीनच गहिरी होणार आहे.

महापालिकेच्या अन्य अभियांत्रिकी खात्यांमध्येही हाच प्रकार आहे. अनेक उपप्रमुख अभियंता पदे रिक्त असून, ती भरली जात नाहीत. त्यामुळे हे पद रिक्त ठेवण्यामागे काही विशिष्ट हेतू आहे का, हे विचारण्याची वेळ अभियंत्यांवर आली आहे. ही पदे नक्की कधी व कुणासाठी राखून ठेवली जात आहेत, यावर प्रशासनाने खुलासा करणे अत्यावश्यक बनले आहे.

या सर्व परिस्थितीचा परिणाम थेट मुंबईतील नागरी सुविधा प्रकल्पांवर होत असून, कामांची वेळेत पूर्तता, दर्जा आणि सुरक्षिततेचा प्रश्न निर्माण झाला आहे. त्यामुळे त्वरित रिक्त उपप्रमुख अभियंता पदे भरून महापालिकेचा अभियांत्रिकी पायाभूत विभाग सक्षम करण्याची गरज अधिक तीव्र झाली आहे. अन्यथा नागरी समस्यांचा डोंगर अधिक उंचावणार, हे निश्चित!