सरकारचा महत्त्वाचा निर्णय !! नोकरीसाठी आता आधार आधारित पडताळणीला मंजुरी ! जाणून घ्या

केंद्र सरकारने राष्ट्रीय भरती एजन्सीला (NRA) आता ऐच्छिक आधार आधारित ओळख पडताळणी करण्यास अधिकृत परवानगी दिली आहे. यामुळे सरकारी नोकरीसाठी अर्ज करणाऱ्या उमेदवारांसह परीक्षेशी संबंधित अधिकारी आणि अन्य भागधारकांची ओळख Aadhaar च्या माध्यमातून पडताळली जाऊ शकते. ही प्रक्रिया संपूर्णतः स्वेच्छेवर आधारित असून, उमेदवार किंवा संबंधित व्यक्तीची हो/नाही प्रमाणीकरण (Yes/No Authentication) किंवा ई-केवायसी (e-KYC) द्वारे पडताळणी केली जाईल.

राष्ट्रीय भरती एजन्सी (NRA) ही एक बहु-एजन्सी संस्था असून, ऑगस्ट 2020 मध्ये केंद्रीय मंत्रिमंडळाने तिच्यासाठी मान्यता दिली होती. NRA चं मुख्य कार्य म्हणजे ग्रुप बी आणि ग्रुप सी पदांसाठी कॉमन एलिजिबिलिटी टेस्ट (CET) घेणे, जी एक संगणक आधारित ऑनलाइन परीक्षा आहे. या परीक्षेद्वारे उमेदवारांची प्राथमिक निवड करण्यात येते.

कार्मिक मंत्रालयाने जारी केलेल्या अधिसूचनेनुसार, आधार प्रमाणीकरणाचा वापर NRA च्या पोर्टलवर नोंदणी करताना, तसेच परीक्षेच्या विविध टप्प्यांवर उमेदवारांची व इतर संबंधितांची ओळख प्रस्थापित करण्यासाठी केला जाईल. मात्र, हे करताना आधार कायदा, 2016 मधील सर्व तरतुदींचे आणि सुशासनासाठी आधार प्रमाणीकरण नियम, 2020 मधील नियम क्रमांक 5 चे काटेकोर पालन आवश्यक राहील. याशिवाय, UIDAI द्वारे निर्धारित मार्गदर्शक तत्त्वांचाही अवलंब करावा लागेल.

यापूर्वीही केंद्र सरकारने UPSC (केंद्रीय लोकसेवा आयोग) आणि SSC (कर्मचारी निवड आयोग) यांना आधारवर आधारित ओळख पडताळणी करण्याची परवानगी दिली होती. नोंदणी आणि परीक्षेच्या विविध टप्प्यांवर उमेदवारांची ओळख स्पष्ट करण्यासाठी हे प्रमाणीकरण उपयुक्त ठरत आहे. आता NRA च्या माध्यमातून या प्रक्रियेला अधिक अधिकृत आणि व्यापक रूप मिळाले आहे.