११वी प्रवेश प्रक्रिया पूर्णत ऑनलाइन, ८ जूनला गुणवत्ता यादी जाहीर होणार!

महाराष्ट्रात शिक्षण क्षेत्रात आणखी एक ऐतिहासिक टप्पा गाठण्यात आला आहे. २०२५-२६ शैक्षणिक वर्षासाठी प्रथम वर्ष कनिष्ठ महाविद्यालय अर्थात ११वी प्रवेश प्रक्रिया पूर्णतः ऑनलाइन आणि केंद्रीकृत पद्धतीने राबविण्यात येत आहे. या प्रक्रियेमुळे पारदर्शकता, जलद कार्यवाही आणि जिल्हास्तरावरील प्रवेशात एकसंधता सुनिश्चित झाली आहे.

माध्यमिक व उच्च माध्यमिक शिक्षण विभागाचे प्रभारी संचालक डॉ. श्रीराम पानझाडे यांनी दिलेल्या माहितीनुसार, यावर्षी एकूण १२ लाख ७१ हजार २९५ विद्यार्थ्यांनी नोंदणी केली आहे. या विद्यार्थ्यांसाठी ९ हजार ४३५ शाळा/महाविद्यालयांनी प्रवेशासाठी नोंदणी केली असून, एकूण २१ लाख २३ हजार ४० जागांची उपलब्धता आहे. यामध्ये कॅप फेरीसाठी १८.९७ लाख तर कोटा प्रवेशासाठी २.२५ लाख जागा राखीव आहेत.

सर्व विद्यार्थ्यांची नोंदणी २६ मे ते ५ जून २०२५ दरम्यान mahafyjcadmissions.in या अधिकृत संकेतस्थळावर पार पडली. नोंदणी शुल्क भरणाऱ्या विद्यार्थ्यांची संख्या १२.१५ लाखांवर, तर अर्ज लॉक करणाऱ्या विद्यार्थ्यांची संख्या ११.२९ लाखांवर पोहोचली आहे.

विशेष म्हणजे, केवळ कॅप फेरीसाठी ११.२९ लाख विद्यार्थी, इनहाऊस कोटासाठी ६४ हजार २३८ विद्यार्थी, व्यवस्थापन कोटासाठी ३२ हजार ७२१ विद्यार्थी, आणि अल्पसंख्याक कोटासाठी ४७ हजार ५७८ विद्यार्थी अर्जदार आहेत. यावरूनच विद्यार्थ्यांचा प्रतिसाद आणि प्रक्रिया किती मोठ्या प्रमाणावर राबवली जात आहे हे लक्षात येते.

या प्रक्रियेत, शून्य फेरी (Zero Round) गुणवत्ता यादी ८ जून २०२५ रोजी प्रसिद्ध होणार आहे. याआधारे विद्यार्थ्यांना ९ ते ११ जून दरम्यान कनिष्ठ महाविद्यालयांमध्ये प्रवेश घेता येणार आहे. त्यानंतर १० जून रोजी कॅप फेरीची गुणवत्ता यादी जाहीर होईल आणि ११ ते १८ जून या कालावधीत त्या आधारे प्रवेश प्रक्रिया होईल.

ही संपूर्ण प्रवेश प्रक्रिया महाराष्ट्रभर समान पद्धतीने आणि वेळापत्रकानुसार राबवली जात आहे. जिल्हानिहाय नोंदणी संख्या, विद्यार्थी पसंतीचे महाविद्यालयांचे गट, कोटावार अर्जदारांची संख्याही विभागाने संकलित केली आहे, जी लवकरच अधिकृत संकेतस्थळावर प्रसिद्ध होईल.

संपूर्ण प्रक्रियेतील पारदर्शकता, वेगवानतेचा अनुभव, विद्यार्थ्यांची डिजिटल साक्षरता आणि पालकांचा विश्वास यामुळे ११वी प्रवेशाचा हा नवीन युग सुरू झाला आहे, असेच म्हणावे लागेल!