‘नॅक’ (NAAC) मूल्यांकनासाठी सहा महिने जास्त वेळ मिळणार!-NAAC Gets Extension!

राज्याच्या उच्च शिक्षण विभागानं एक मोठा निर्णय घेतला हं! अकृषी विद्यापीठांशी संलग्न असलेल्या महाविद्यालयांना आता ‘नॅक’ (NAAC) मूल्यांकनासाठी सहा महिने जास्त वेळ मिळणार आहे. गुरुवारी, २२ मे रोजी यावर शिक्कामोर्तब झालं.

मराठवाडा विद्यापीठानं नुकतंच २३३ महाविद्यालयांवर कठोर कारवाई करत त्यांचे २०२५-२६ या शैक्षणिक वर्षाचे प्रथम वर्षाचे प्रवेश बंद केले होते, कारण त्यांनी ‘नॅक’चं काम वेळेत केलं नव्हतं.

राज्यातल्या सगळ्या महाविद्यालयांसाठी नॅक मूल्यांकन करणं बंधनकारक आहे. विद्यापीठ कायद्यानुसार, जर कुणी ‘नॅक’ नाही केलं, तर त्यांच्या प्रवेशाला ब्रेक लागतो. त्यामुळे अनेक विद्यापीठांनी कारवाईचा बडगा उगारलेला होता.

डॉ. बाबासाहेब आंबेडकर मराठवाडा विद्यापीठानं तर प्रथमच एवढ्या मोठ्या प्रमाणात— तब्बल २३३ कॉलेजेसवर कारवाई करत, त्यांचे प्रवेशच थांबवले. या विद्यापीठाशी एकूण ४८४ महाविद्यालयं संलग्न आहेत, त्यातले फक्त २५१ महाविद्यालयांमध्ये प्रवेश सुरू ठेवण्यात आला होता.

पण आता नवीन निर्णयामुळे त्या २३३ महाविद्यालयांना दिलासा मिळाला आहे. अनेक विद्यापीठांना जी कारवाई चालू होती ती थांबवावी लागणार आहे, असं बोललं जातंय.

काय झालं सरकारच्या बैठकीत?

२१ मे रोजी उच्च शिक्षण मंत्री चंद्रकांत पाटील यांच्या अध्यक्षतेखाली बैठक झाली. त्या बैठकीत नॅकचं ऑनलाइन पोर्टलच बंद असल्याचं लक्षात आलं. त्यामुळे विद्यार्थ्यांचं नुकसान होऊ नये म्हणून सहा महिन्यांची मुदतवाढ देण्याचे आदेश देण्यात आले, असं अधिकृत पत्रात म्हटलंय.