चिंता मिटली !! परदेशात वैद्यकीय शिक्षण पूर्ण केलेल्या विद्यार्थ्यांना भारतात सर्टिफिकेट मिळणार !-Certificate Relief for Students!

परदेशात वैद्यकीय शिक्षण पूर्ण करून परत आलेल्या विद्यार्थ्यांची चिंता अखेर दूर झाली आहे. भारतात इंटर्नशिप सुरू करण्यासाठी आवश्यक असलेले प्रोव्हिजनल रजिस्ट्रेशन सर्टिफिकेट मिळवण्याचा मार्ग आता खुला झाला आहे.

भारतात परतल्यावर या विद्यार्थ्यांना मेडिकल कौन्सिल ऑफ इंडिया तर्फे घेण्यात येणारी परीक्षा (FMGE) पास करावी लागते. ही परीक्षा उत्तीर्ण केल्यानंतरच त्यांना भारतात इंटर्नशिप करता येते. या प्रक्रियेमध्ये प्रोव्हिजनल रजिस्ट्रेशन सर्टिफिकेट मिळवणे हा महत्त्वाचा टप्पा असतो.

अलीकडेच सुरू झालेल्या पदव्युत्तर वैद्यकीय शिक्षणासाठीच्या NEET-PG अर्ज प्रक्रियेमुळे (१७ एप्रिल ते ७ मे) विद्यार्थ्यांमध्ये घाई निर्माण झाली होती. अर्ज भरण्याची अंतिम मुदत जवळ येऊनही, महाराष्ट्र मेडिकल कौन्सिलने अनेक विद्यार्थ्यांना प्रोव्हिजनल सर्टिफिकेट देण्यात दिरंगाई केली होती. शुल्क आकारणीही अद्याप सुरू नव्हती, त्यामुळे अनेक विद्यार्थी अभ्यासाऐवजी या सर्टिफिकेटच्या मागे धावायला लागले होते.

ही परिस्थिती लक्षात घेऊन काही विद्यार्थी व पालकांनी भाजप युवा मोर्चाचे प्रदेश उपाध्यक्ष तुषार हिंगे यांच्याशी संपर्क साधला. हिंगे यांनी विधानपरिषदेच्या आमदार उमा खापरे यांच्याशी चर्चा करून विषयाची गांभीर्याने दखल घेतली. उमा खापरे यांनी तातडीने वैद्यकीय शिक्षण राज्यमंत्री माधुरी मिसाळ यांच्याशी संपर्क साधून त्वरित कारवाईची मागणी केली.

माधुरी मिसाळ यांनी संबंधित अधिकाऱ्यांना आदेश दिले आणि महाराष्ट्र मेडिकल कौन्सिलला सखोल सूचना दिल्या. त्यानंतर काही तासांतच विद्यार्थ्यांना पेमेंट लिंक पाठवण्यात आल्या आणि सर्टिफिकेट देण्याची प्रक्रिया सुरू झाली.
या निर्णयामुळे अंदाजे १६०० हून अधिक विद्यार्थ्यांना मोठा दिलासा मिळणार आहे.

विद्यार्थ्यांना प्रोव्हिजनल सर्टिफिकेट लवकरच मिळेल, अशी माहिती कौन्सिलकडून देण्यात आली आहे. विद्यार्थ्यांनी आणि त्यांच्या पालकांनी राज्यमंत्री माधुरी मिसाळ, आमदार उमा खापरे आणि तुषार हिंगे यांचे आभार मानले आहेत.

प्रोव्हिजनल रजिस्ट्रेशन सर्टिफिकेटमध्ये उशीर का होतो?

परदेशी शिक्षण घेणाऱ्या विद्यार्थ्यांची संख्या दिवसेंदिवस वाढत असताना, त्यांच्या सर्टिफिकेटसाठी होणारा विलंब ही गंभीर बाब आहे. भारतातल्या वैद्यकीय शिक्षणाच्या खर्चाशी तुलना करता परदेशातील शिक्षण तुलनेत स्वस्त असते.
मात्र प्रोव्हिजनल सर्टिफिकेट देण्यात येणारा विलंब नवीन नाही, असे पालक सांगतात. या निमित्ताने मेडिकल कौन्सिल प्रशासनाची गाफील वृत्ती समोर आली आहे. भविष्यात विद्यार्थ्यांच्या करिअरसाठी अशा अडथळ्यांवर तातडीने उपाययोजना व्हाव्यात, अशी अपेक्षा व्यक्त होत आहे.