खुशखबर !! बार्टी मार्फत १००० उमेदवारांना थेट जर्मनीत नोकरीची संधी !-BARTI Boost Career in Germany!

‘बार्टी’च्या पुढाकारामुळे महाराष्ट्रातील अनुसूचित जातीच्या हजार जणांना थेट जर्मनीमध्ये करिअर घडवण्याची ऐतिहासिक संधी उपलब्ध झाली आहे. डॉ. बाबासाहेब आंबेडकर संशोधन व प्रशिक्षण संस्था (बार्टी) आणि निटकॉन, दिल्ली या संस्थांच्या संयुक्त प्रयत्नातून ही विशेष योजना राबवली जात आहे.

ज्या उमेदवारांची निवड करण्यात आली आहे, त्यांना जर्मन भाषा शिकवण्यासाठी तीन महिन्यांचे निःशुल्क प्रशिक्षण दिले जाणार आहे. या काळात प्रशिक्षणार्थ्यांना दरमहा चार हजार रुपयांचे विद्यावेतन दिले जाईल, जे त्यांना आर्थिकदृष्ट्या मदत करेल.

प्रशिक्षणानंतर उमेदवारांना “गोएथे इन्स्टिट्यूट” द्वारा घेण्यात येणारी प्रमाणपत्र परीक्षा द्यावी लागेल, कारण हे प्रमाणपत्र जर्मनीमध्ये अधिकृतपणे मान्य असते. या परीक्षेसाठी उमेदवारांना योग्य ते मार्गदर्शन, तयारी व सहकार्य दिले जाईल. शिवाय, उमेदवारांचे पासपोर्ट, व्हिसा आणि अन्य आवश्यक कागदपत्रांची पूर्तता करण्यात मदत केली जाणार आहे, जेणेकरून त्यांचा परदेशात जाण्याचा संपूर्ण प्रवास सुलभ होईल.

या संधीसाठी उमेदवारांची निवड २ एप्रिल २०२५ रोजी झालेल्या चाचणी परीक्षेवर आणि त्यानंतरच्या मुलाखतीवर आधारित होती. उमेदवारांचे एकत्रित गुण लक्षात घेऊन केंद्रनिहाय गुणवत्ता यादी बार्टीने जाहीर केली आहे. पुणे – १८०, छत्रपती संभाजीनगर – १६०, नागपूर (२ केंद्रे) – प्रत्येकी १०५, दापोडी – १२०, ठाणे – १००, नाशिक – १००, नवी मुंबई – ५०, अहिल्यानगर – ५० आणि हिंगोली – ३० अशा पद्धतीने एकूण १,००० उमेदवारांची निवड करण्यात आली आहे.

ही योजना केवळ रोजगाराचाच नव्हे, तर आंतरराष्ट्रीय स्तरावर आपल्या विद्यार्थ्यांना सिद्ध होण्याची संधी देणारी आहे. बार्टीच्या या उपक्रमामुळे अनेक तरुणांचे जीवनच पालटण्याची शक्यता निर्माण झाली आहे.