लवकरच , पशुवैद्यकीय महाविद्यालयात 3,000 पदांची भरती ! चला तर मग जाणून घेऊया

लवकरच, पशुवैद्यकीय महाविद्यालयात ३००० रिक्त पदांची भरती सुरु होणार आहे. तरुणांसाठी ही सुवर्ण संधी चालून आलेली आहे. जाणून घ्या खाली दिलेली संपूर्ण माहिती !   राज्यात पशुधनाची संख्या ३ कोटी ३० लाखांवर पोहोचली असताना, पुरेसे पशुवैद्यकीय कर्मचारी उपलब्ध नाहीत. राष्ट्रीय कृषी आयोगाच्या शिफारशीनुसार दर ५००० प्राण्यांमागे एक पशुवैद्यक असणे आवश्यक आहे. या पार्श्वभूमीवर शासनाने पशुवैद्यकीय सेवांमध्ये सुधारणा करण्यासाठी मोठा निर्णय घेतला असून ३,००० पशुवैद्यकांची भरती लवकरच करण्यात येणार असल्याची माहिती पशुसंवर्धन मंत्री पंकजा मुंडे यांनी विधानपरिषदेत दिली.

सध्या अकोला, सांगली, बारामती आणि परभणी येथे नवीन पशुवैद्यकीय महाविद्यालये मंजूर करण्यात आली आहेत. या शासकीय महाविद्यालयांमध्ये शिकणाऱ्या विद्यार्थ्यांसाठी शुल्कवाढ होणार नाही, तसेच खासगी पशुवैद्यकीय महाविद्यालयांमध्येही शुल्क नियमन प्राधिकरणामार्फत शुल्क ठरवले जाणार आहे. यासोबतच, खासगी महाविद्यालयांना परवानगी देताना शासनाने कठोर निकष लागू केले आहेत, असेही मंत्री मुंडे यांनी स्पष्ट केले.

पशुवैद्यकीय सेवा बळकट करण्यासाठी सरकारने श्रेणी-१ पशू रुग्णालयांमध्ये पदवीधारक पशुवैद्यक असणे बंधनकारक केले आहे. त्यामुळे राज्यात ३,००० हून अधिक पशुवैद्यकांची आवश्यकता निर्माण होणार आहे. हा निर्णय पशुवैद्यकीय परिषद अधिनियमाच्या अंतर्गत घेण्यात आला असून यामुळे पशुधनासाठी अधिक चांगल्या वैद्यकीय सेवा पुरवता येतील.

शासकीय पशुवैद्यकीय महाविद्यालयांच्या स्थितीबाबत विधानपरिषद सदस्य अरूण लाड यांनी लक्षवेधीद्वारे प्रश्न विचारला होता. यावेळी एकनाथ खडसे, सदाभाऊ खोत आणि अभिजित वंजारी यांनीही उपप्रश्न उपस्थित केले. राज्यातील पशुवैद्यकीय शिक्षण आणि पशुसंवर्धन व्यवस्थेत सुधारणा करण्यासाठी शासन कटिबद्ध असल्याचेही मंत्री मुंडे यांनी यावेळी सांगितले.