इंटर्नशिप करायची आहे तर बघा !यंदा महाराष्ट्र आरोग्य विज्ञान विद्यापीठाच्या ‘समर इंटर्नशिप प्रोग्रॅमसाठी’ १००० जागा !

महाराष्ट्र आरोग्य विज्ञान विद्यापीठाच्या समर इंटर्नशिप प्रोग्रॅमसाठी (एसआयपी) यंदा जवळपास 1000 जागा उपलब्ध करून दिल्या जाणार आहेत. या उपक्रमाची प्रक्रिया विद्यापीठामार्फत सुरू करण्यात आली आहे. सुरुवातीच्या टप्प्यात विविध केंद्रांची नोंदणी केली जाणार असल्याचे विद्यापीठ प्रशासनाने सांगितले.

विद्यार्थ्यांच्या कौशल्यवृद्धीसाठी उपक्रम
करोनाकाळानंतर आंतरविद्याशाखीय ज्ञानाचे महत्त्व अधोरेखित झाले आहे. विद्यार्थ्यांना आरोग्यशास्त्राच्या विविध शाखा, तंत्रज्ञान व प्रक्रिया यांची ओळख व्हावी, तसेच प्रत्यक्ष अनुभव मिळावा यासाठी विद्यापीठाच्या कुलगुरू डॉ. माधुरी कनिटकर यांनी तीन वर्षांपूर्वी एसआयपी उपक्रम सुरू केला. याअंतर्गत आरोग्यशास्त्र अभ्यासक्रमाच्या पहिल्या ते तिसऱ्या वर्षातील विद्यार्थी विविध ठिकाणी प्रत्यक्ष कामाचा अनुभव घेतात. त्यांना विद्यावेतनही दिले जाते.

उपक्रमाचा वाढता विस्तार
गेल्या तीन वर्षांत या उपक्रमाची व्याप्ती वाढली आहे. 2021 मध्ये 20 केंद्रे, 2022 मध्ये 60 केंद्रे, तर 2023 मध्ये 80 केंद्रे होती. यंदा 100 केंद्रांवर हा उपक्रम राबवला जाणार आहे, असे समन्वयक संदीप राठोड यांनी सांगितले. विद्यार्थीसंख्याही 150, 400 आणि 600 वरून यंदा 1000 पर्यंत जाणार आहे.

अर्ज प्रक्रिया 20 मार्चपासून सुरू
विद्यार्थ्यांसाठी 20 मार्च ते 4 एप्रिल या कालावधीत अर्जप्रक्रिया सुरू राहणार आहे. विद्यापीठामार्फत विविध केंद्रांची निवड करून त्यांना कार्यशाळा आयोजित करण्याचे निर्देश देण्यात आले आहेत. विद्यार्थ्यांनी 10 मेपूर्वी संबंधित केंद्रात हजर राहणे अनिवार्य असेल.

विद्यार्थ्यांमध्ये सकारात्मक बदल
हा उपक्रम सुरू केल्यानंतर विद्यार्थ्यांच्या कौशल्यामध्ये मोठा बदल झाल्याचे आढळले आहे. सुरुवातीच्या व अंतिम मूल्यमापनातून हा बदल स्पष्टपणे जाणवतो, असे समन्वयक संदीप राठोड यांनी सांगितले. कुलगुरू डॉ. माधुरी कनिटकर यांच्या संकल्पनेतून सुरू झालेला हा उपक्रम दरवर्षी अधिक व्यापक होत आहे.