बारावीचा निकाल लवकर लावण्याचे प्रयत्न सुरु !

बारावी परीक्षेच्या उत्तरपत्रिका तपासणीची प्राथमिक तयारी सुरू झाली आहे. नागपूर विभागीय परीक्षा मंडळाने मॉडरेटर्सच्या बैठका सुरू केल्या असून, लवकर निकाल लावण्याचे लक्ष्य ठेवण्यात आले आहे. शिक्षकांकडे उत्तरपत्रिका पाठवण्याची प्रक्रिया लवकरच सुरू होणार आहे.

राज्य मंडळाच्या बारावी परीक्षेला ११ फेब्रुवारीपासून सुरुवात झाली. पूर्ण झालेल्या पेपर्सच्या उत्तरपत्रिका मंडळाच्या ताब्यात ठेवण्यात आल्या असून, आता त्यांच्या तपासणीला सुरुवात होईल. मॉडरेटर्सना आवश्यक सूचना देणे आणि कामाची विभागणी करण्याचे काम सुरू आहे. त्यानंतर, उत्तरपत्रिका मॉडरेटर्सच्या शाळांमध्ये पाठवल्या जातील, जिथे पाच ते सहा शिक्षक मूल्यांकनासाठी नियुक्त असतील.

उत्तरपत्रिकांचे प्रत्यक्ष मूल्यमापन अद्याप सुरू झाले नसले तरी तयारी अंतिम टप्प्यात आहे. लवकरच शिक्षकांना तपासणीसाठी आदेश आणि उत्तरपत्रिका वितरित केल्या जातील. तपासणी पूर्ण झाल्यावर, उत्तरपत्रिका मंडळाकडे सुपूर्द करण्यात येतील आणि त्यानंतर सहा जिल्ह्यांचा निकाल प्रक्रियेस गती मिळेल.

यंदा राज्य मंडळाने बारावी आणि दहावीच्या परीक्षा लवकर घेतल्या असून, विद्यार्थ्यांचे पुढील सत्र वेळेत सुरू व्हावे आणि प्रवेश प्रक्रिया वेळेवर पूर्ण व्हावी, यासाठी हा निर्णय घेण्यात आला आहे.