महिला विशेष !! पालघरच्या ५८ हजार महिलांच्या ‘लखपती दीदी’ या अभियानाची भरारी !

पालघर जिल्ह्यातील ग्रामीण आणि आदिवासी महिलांनी ‘लखपती दीदी’ अभियानाच्या माध्यमातून आर्थिक स्वावलंबनाचा नवा अध्याय लिहिला आहे. आतापर्यंत ५८ हजारांहून अधिक महिलांनी लखपती होण्याचा टप्पा पार केला असून, शेतीपूरक व्यवसाय, अन्नप्रक्रिया, दुग्धव्यवसाय, लघुउद्योग आणि सेवा क्षेत्रात उद्योजकतेला नवा वाव मिळत आहे. त्यांच्या मासिक उत्पन्नाचा सरासरी आकडा १०,००० रुपयांपर्यंत पोहोचला आहे.

‘लखपती दीदी’ अभियानाची भरारी
राज्यातील ग्रामीण व आदिवासी महिलांच्या आर्थिक प्रगतीसाठी सुरू करण्यात आलेल्या ‘लखपती दीदी’ अभियानात पालघर जिल्ह्यातील महिलांचा मोठा सहभाग दिसून येत आहे. या अभियानांतर्गत ७३,२५५ महिलांना लखपती बनवण्याचे उद्दिष्ट ठेवण्यात आले होते. आतापर्यंत ५८,६६२ महिलांनी यशस्वीपणे आर्थिक स्वयंपूर्णतेकडे वाटचाल केली आहे. मोखाडा, जव्हार, डहाणू, वसई, विक्रमगड, वाडा, तलासरी आणि पालघर या आठ तालुक्यांमध्ये अभियानाचा मोठा प्रभाव दिसून आला आहे.

महिला सक्षमीकरणाचा नवा अध्याय
महिलांनी दुग्धव्यवसाय, कुक्कुटपालन, अन्नप्रक्रिया, हस्तकला, कुटीर उद्योग आणि कृषिपूरक व्यवसाय या विविध क्षेत्रांमध्ये उद्योजकता वाढवली आहे. यामुळे त्यांना दरवर्षी एक लाख रुपयांपेक्षा अधिक उत्पन्न मिळू लागले आहे. जिल्हा प्रशासन, महिला व बालविकास विभाग आणि स्वयंसेवी संस्थांच्या सहकार्याने बचत गटांना प्रोत्साहन, व्यवसाय प्रशिक्षण आणि आर्थिक मदतीच्या विविध योजना उपलब्ध करून देण्यात येत आहेत.

महिला सक्षमीकरणासाठी प्रशासनाचे प्रयत्न
पालघर जिल्ह्याच्या मुख्य कार्यकारी अधिकाऱ्यांनी सांगितले की, ‘लखपती दीदी’ अभियानामुळे हजारो महिलांचे जीवनमान उंचावले आहे. स्वयंसहाय्यता गट, वित्तपुरवठा आणि विविध सरकारी योजनांच्या सहाय्याने महिलांनी स्वतःचा व्यवसाय उभा केला आहे. उर्वरित १४,५९३ महिलांना लखपती बनवण्यासाठी विशेष प्रयत्न सुरू आहेत.

पालघर जिल्ह्यातील महिलांचा ‘लखपती’ प्रवास हा आत्मनिर्भर भारताच्या दिशेने एक महत्त्वाचा टप्पा ठरत आहे.